Policia harton plan operativ për zgjedhjet

[Kosovarja]

Policia e Kosovës së bashku me policinë e EULEX dhe forcat paqeruajtëse janë duke e hartuar në plan të përbashkët operativ, në mënyrë që zgjedhjet e jashtëzakonshme në Kosovë, të cilat do të mbahen më 12 dhjetor, të zhvillohen në një atmosferë të qetë.
“Qëllimi i përgatitjes së këtij plani operacional është ofrimi i sigurisë për të gjithë qytetarët, në mënyrë që ata të mund të ushtrojë të drejtën e tyre të votës, po ashtu të mbajmë rend dhe qetësi publike, të ofrojmë siguri për të gjithë procesin zgjedhor, që përfshihet edhe fushata zgjedhore”, tha për DW, zëdhënësi i policisë së Kosovës, Baki Kelani.

Një pjesë e madhe e serbëve të Kosovës tashmë kanë paralajmëruar pjesëmarrjen në zgjedhje, mirëpo ata kundërshtohen nga përfaqësuesit politikë të serbëve të veriut. Megjithëkëtë, sipas KQZ-së edhe në veri të Kosovës do të hapen qendrat e votimit. Zëdhënësi i policisë, Kelani, ka thënë se një angazhim më i shtuar do të jetë në veri të Kosovës, pjesë kjo e banuar me shumicë serbe.