Tuna kopjon “The pretty reckless”

[Juѕт٠]

Pasi “Bluetooth” një javë më parë botoi lajmin për klipin e kopjuar të Aurela Gaçes, një tjetër këngëtare shqiptare bëhet protagoniste e një lajmi të tillë. Edhe Tuna Sejdiu, këngëtarja nga Maqedonia shfaqet në televizione me një klip të kopjuar. Kënga “Dyshemeja” e kompozuar vite më parë për këngëtaren nga Robert Bilbilov me një tekst fantastike të Aida Barakut shoqërohet edhe me një klip po kaq fantastik të “Entermedia”. Veçse klipi çalon në një pikë që është edhe shumë e rëndësishme: Është një klip i kopjuar. Nëse do të klikoni në youtube këngën “U make me wanna die” të grupit “The Pretty Reckless” do të shihni një ngjashmëri të jashtëzakonshme mes dy klipeve madje edhe në aktrimin e dy protagonisteve të klipit.

Liderja e grupit “The pretty reckless”, Taylor Momsem në klip mban veshur një palë të brendshme, Tuna gjithashtu shfaqet në klip vetëm me një body dhe një tip xhaketë të lehtë të hedhur krahëve.

Klipi “U make me wanna die” u lançua një vit më parë dhe pati një sukses të jashtëzakonshëm. Rryma muzikore e grupit të ri amerikan është alternative. Taylor, liderja e grupit për të shkruar këngët e saj është frymëzuar nga legjendarët e muzikës alternative dhe rrok si “Oasis”, “Led Zeppelin”, “The who” “Pink Flloyd” etj por asnjë nga klipet e saj nuk janë kopje të klipeve të emrave të mësipërm.

Nuk mund të thuhet e njëjta gjë për këngëtaren nga Tetova e cila jo thjesht është frymëzuar nga klipi “u wanna make me die” por e ka kopjuar në një mënyrë të përsosur. Shumë skena të klipit të Tunës; si skena e zjarrit, skena kur këngëtarja rrëzohet në dysheme janë fiks si skenat e Taylor .

Grupit “The pretty reckless” janë një grup i ri i muzikës alternative por kjo nuk do të thotë që nuk janë aq të njohur sa për të mos u vënë re edhe nga publiku shqiptar. Ka qenë një fans shqiptar I grupit “The pretty reckless” që dërgoi linkun e këtij klipi në faqen tonë në facebook nga ku u bë krahasimi me klipin e Tunës.