Batmani “mbron” Sarajevën

[Juѕт٠]

Plaçkitjet, të shtënat, hedhja e bombave dhe vrasjet gjithnjë e më të shpeshta janë arsye që qytetarët e kryeqytetit të Bosnjës dhe Hercegovinës, Sarajevë të mos ndihen të sigurt. Autoritetet duket se nuk janë në gjendje të luftojnë krimin, kështu që sarajevasit vendosën ta angazhojnë një super-hero i cili do t’i mbronte ata. Konkursi është shpallur – kërkohet një Batman me përvojë.
Shpallja interesante për punë u publikua në faqen boshnjake të internetit për shpallje të lira Market.ba. Qytetarët e Sarajevës të cilët çdo ditë ballafaqohen me rritjen e shkallës së krimit nëpër rrugët e qytetit, vendosën ta angazhojnë një Batman.

Në konkursin e shpallur thuhet se kërkohet një Batman i cili ka së paku tri vjet përvojë pune në kryerjen e punëve të ngjashme, posedon përgatitje profesionale të punës si dhe njeh artet marciale.

Të gjithë ata që vendosin të paraqiten për konkursin duhet ta dinë se duhet të jenë të saktë dhe të përgjegjshëm, pastaj duhet ta fshehin mirë identitetin e tyre, ndërsa për këtë lloj pune duhet që Batmani të posedojë edhe makinën e tij.

Puna e Batmanit nuk është aspak e lehtë, për këtë arsye punëdhënësit - qytetarët e Sarajevës - i ofrojnë Batmanit marrëdhënie të përjetshme pune, pagë të rregullt, ndërsa Batmani mund të punësojë vëllain ose kushërinjtë, nëse kanë shkathtësitë si të shokut të tij më të mirë, Robinit.

E tëra që pritet prej Batmanit është që t’i ndihmojë qytetarët sa herë që gjenden në vështirësi, të parandalojë plaçkitjet, të shtënat, vrasjet, të kontrollojë lagjet e kantonit të Sarajevës dhe rregullisht të kontrollojë terrenin.